– उद्धव ठाकरेंचा स्फोटक आरोप
– राजकारणात खळबळ
मुंबई | प्रतिनिधी
राज्याच्या राजकारणात आज मोठा भूकंप झाला आहे. शिवसेना (ठाकरे गट) प्रमुख उद्धव ठाकरे यांनी पत्रकार परिषदेत भाजप, केंद्र सरकार, आणि राष्ट्रीय स्वयंसेवक संघावर अक्षरशः धडाधड आरोपांची सरबत्ती केली. एकीकडे भ्रष्टाचार, तर दुसरीकडे गोमांस आणि हिंदुत्वाचा मुद्दा… उद्धव ठाकरेंच्या प्रत्येक विधानाने राजकीय वातावरण तापवले आहे.
पत्रकार परिषदेत सर्वप्रथम गोमांसाच्या मुद्द्यावर केंद्र आणि भाजपला लक्ष्य करत उद्धव ठाकरे म्हणाले, “तुमच्या मंत्रिमंडळात गोमांस खाणारे मंत्री आहेत. मी गोमांस खातो… मला कोणी अडवतो ते पाहतो!” या वक्तव्याने उपस्थितांना क्षणभर धक्का बसला.
यानंतर त्यांनी थेट आरएसएसवर निशाणा साधत आणखी मोठा आरोप केला, “दिल्लीमध्ये संघाच्या कार्यालयासाठी प्राचीन मंदिर पाडलं… आणि आम्हाला हिंदुत्व शिकवता?”
उद्धव ठाकरेंनी पालघर साधू हत्याकांडाची आठवण करून देत भाजपवर खालचा पातळीचा राजकारणाचा आरोप केला. ते म्हणाले, “साधू हत्याकांड सरकारवर टांगलं… पण आरोपींनाच नंतर भाजपमध्ये घेतलं! अमित शहांनी माझ्या हिंदुत्वावर प्रश्न उपस्थित करण्यापूर्वी आपला चेहरा आरशात पाहावा!”
पत्रकार परिषद उत्कर्षबिंदूला पोहोचली तेव्हा उद्धव ठाकरे यांनी एक धक्कादायक सवाल केला…
“वंदे मातरमचा मुद्दा त्यांनी संघाचे कपडे उतरवण्यासाठीच काढला की काय?”
या वाक्याने सभागृहात क्षणभर शांतता पसरली. त्यांनी पुढे शामाप्रसाद मुखर्जींच्या राजकीय इतिहासाचा संदर्भ देत,
“ज्यांना ते देव मानतात, तेच मुस्लिम लीगसोबत तीनवेळा सरकारात होते… आणि आम्हाला हिंदुत्व शिकवणार?” असा रोखठोक प्रश्न उपस्थित केला.
याचबरोबर मंदिराच्या आवारात दिवा लावण्यावरून न्यायाधीशांनी घेतलेल्या आक्षेपाचा त्यांनी उल्लेख केला आणि केंद्रावर धार्मिक भावनांचा राजकीय वापर केल्याचा आरोप केला.
उद्धव ठाकरेंची ही पत्रकार परिषद संपली, पण तिचे राजकीय पडसाद फडणवीस ते अमित शाह, दिल्लीपासून मुंबईपर्यंत जाणवणार हे निश्चित आहे.
राज्यातील राजकारण आता आणखी पेटण्याची शक्यता स्पष्टपणे दिसू लागली आहे.
