दिल्लीतील ‘स्नेहभोजन’मुळे राजकारण सरसावलं!”
नवी दिल्ली : राज्यात महापालिकेच्या निवडणुकांची रणधुमाळी सुरू असताना, पडद्यामागे राजकीय वातावरणात हलचल चांगलीच वाढली आहे. राष्ट्रवादीतील दोन गट परत एकत्र येणार का? असा प्रश्न पुन्हा एकदा राजकीय वर्तुळात जोरदार चर्चेला आला आहे. कारण त्याच दिशेने इशारा करणारी एक मोठी माहिती आता समोर आली आहे— खासदार शरद पवार यांनी उपमुख्यमंत्री अजित पवार आणि राष्ट्रवादीचे नेते प्रफुल्ल पटेल यांना स्नेहभोजनासाठी आमंत्रित केले आहे.
नेमकी काय घडले राज्याच्या राजकारणात?
सूत्रांच्या माहितीनुसार, शरद पवार यांनी त्यांच्या दिल्लीतील निवासस्थानी आयोजित स्नेहभोजनासाठी अजित पवार आणि प्रफुल्ल पटेल यांना खास निमंत्रण दिले आहे. शरद पवार यांच्या वाढदिवसानिमित्त हा कार्यक्रम आयोजित करण्यात आला असून, हे निमंत्रण स्वतः पवार साहेबांनी दिले, ही बाब विशेष ठरत आहे.
पवार साहेबांचा प्रफुल्ल पटेलांना ‘थेट’ फोन
शरद पवार यांचा वाढदिवस दोन दिवसांवर आला असताना, त्यांनी महाविकास आघाडीतील सर्व खासदार आणि नेत्यांना स्नेहभोजनाचे निमंत्रण पाठवले आहे. त्यात अजित पवारांच्या राष्ट्रवादीतील काही नेतेही आहेत. स्वतः शरद पवार यांनी प्रफुल्ल पटेल यांना फोन करून आमंत्रण दिल्याचे समोर आले आहे.
प्रफुल्ल पटेल स्नेहभोजनाला जाणे निश्चित मानले जात आहे. दुसरीकडे, उपमुख्यमंत्री अजित पवारदेखील दिल्लीला जाण्याची शक्यता व्यक्त केली जात असून, त्यांची उपस्थितीही जवळजवळ निश्चित मानली जात आहे.
ही भेट फक्त ‘स्नेहभोजन’ की काही मोठे गणित?
शरद पवार, अजित पवार आणि प्रफुल्ल पटेल एकाच ठिकाणी एकत्र येण्याची शक्यता… आणि तेही निवडणुकांच्या तोंडावर— या योगायोगामुळे राज्याच्या राजकारणात नवनवीन चर्चा रंगायला सुरुवात झाली आहे.
अजित पवार यांच्या पक्षाने ही फक्त स्नेहभोजनाची भेट असल्याचे स्पष्टीकरण दिले असले, तरी
“पडद्यामागे काहीतरी मोठे शिजत आहे का?”
या प्रश्नाने राजकीय वातावरण तापले आहे.
राजकारणातील पुढील काही दिवस अत्यंत निर्णायक ठरणार आहेत, एवढे मात्र स्पष्ट!
