– म्युझिक फेस्टिव्हलला जाताना मोठा अपघात
– अभिनेत्रीला तातडीने रुग्णालयात दाखल
मुंबई | प्रतिनिधी
बॉलिवूडची लोकप्रिय डान्सर-अभिनेत्री नोरा फतेही हिच्या चाहत्यांसाठी धक्कादायक बातमी समोर आली आहे. मुंबईत नोरा फतेहीच्या कारला भीषण अपघात झाला असून, एका मद्यधुंद चालकाने तिच्या कारला जोरदार धडक दिली. हा अपघात इतका भीषण होता की गाडीचे मोठ्या प्रमाणात नुकसान झाले.
म्युझिक फेस्टिव्हलला जात असताना अपघात
मिळालेल्या माहितीनुसार, नोरा फतेही ही प्रसिद्ध फ्रेंच म्युझिक प्रोड्यूसर आणि डीजे डेविड गुएटा यांच्या म्युझिक फेस्टिव्हलसाठी जात होती. कार्यक्रमासाठी निघालेल्या नोराच्या कारला अचानक समोरून येणाऱ्या एका मद्यधुंद चालकाने वेगात धडक दिली. या धडकेमुळे काही काळ परिसरात एकच खळबळ उडाली.
गाडीचे मोठे नुकसान, नोराची प्रकृती कशी आहे?
अपघातात नोराच्या कारचे मोठे नुकसान झाले असले तरी सुदैवाने नोरा फतेहीला गंभीर दुखापत झाली नाही. तिला किरकोळ जखमा झाल्या असून खबरदारी म्हणून तातडीने जवळच्या रुग्णालयात नेऊन वैद्यकीय तपासणी करण्यात आली. डॉक्टरांनी दिलेल्या माहितीनुसार, नोराची प्रकृती सध्या स्थिर असून ती पूर्णपणे सुरक्षित आहे.
मद्यधुंद चालकावर गुन्हा दाखल
या प्रकरणी पोलिसांनी तत्काळ कारवाई करत मद्यधुंद अवस्थेत वाहन चालवणाऱ्या चालकावर गुन्हा दाखल केला आहे. अपघाताची सखोल चौकशी सुरू असून, सीसीटीव्ही फुटेजच्या आधारे अधिक तपास केला जात आहे.
चाहत्यांकडून काळजी व्यक्त
नोरा फतेहीच्या अपघाताची बातमी समजताच सोशल मीडियावर तिच्या चाहत्यांनी काळजी व्यक्त केली आहे. अनेकांनी “नोरा लवकर बरी होवो” अशा शुभेच्छा दिल्या आहेत.
