– महाराष्ट्रभर विस्ताराचा निर्धार
मुंबई | संवाददाता :
मराठी उद्योजकांना एकत्र आणत त्यांना सक्षम, संघटित आणि व्यावसायिकदृष्ट्या बळकट करण्याच्या उद्देशाने कार्यरत असलेल्या समृद्ध मराठी चेंबर ऑफ कॉमर्स (SMCC) अंतर्गत चारकोप विभागाची दुसरी गेस्ट व मेंबर्स मीटिंग मोठ्या उत्साहात आणि यशस्वीरीत्या पार पडली. या बैठकीला मराठी उद्योजक, व्यावसायिक तसेच नवोदित उद्योजकांचा उत्स्फूर्त प्रतिसाद लाभला.
या बैठकीदरम्यान आठ मराठी उद्योजकांनी SMCC चे अधिकृत सदस्यत्व स्वीकारले. त्यामुळे चारकोप आणि बोरिवली परिसरात संघटनेचा विस्तार अधिक मजबूत झाल्याचे चित्र पाहायला मिळाले. मराठी उद्योजकांसाठी नेटवर्किंग, व्यवसाय सहकार्य आणि संधी निर्माण करण्याच्या दिशेने ही बैठक अत्यंत महत्त्वाची ठरली.
बैठकीचा मुख्य उद्देश मराठी उद्योजकांमधील नेटवर्किंग वाढवणे, व्यवसायातील संधींवर सखोल चर्चा करणे आणि SMCC च्या दीर्घकालीन उद्दिष्टांचा आढावा घेणे हा होता. कार्यक्रमादरम्यान सदस्य व अतिथी उद्योजकांमध्ये मुक्त संवाद झाला, अनुभवांची देवाणघेवाण झाली तसेच प्रेरणादायी मार्गदर्शन सत्रातून उपस्थितांना नवा व्यावसायिक दृष्टीकोन मिळाला.
या प्रसंगी SMCC चे CEO श्री. राम कोळवणकर यांनी उपस्थितांना संबोधित करत सांगितले की, “मराठी उद्योजकांनी एकत्र येत विश्वास, सहकार्य आणि शिस्तबद्ध व्यावसायिक नेटवर्क उभारणे ही काळाची गरज आहे. SMCC हे केवळ एक संघटन नसून, मराठी उद्योजकांसाठी एक मजबूत व्यावसायिक इकोसिस्टम निर्माण करणारे व्यासपीठ आहे.”
तर SMCC चे संस्थापक अध्यक्ष श्री. संजय यादवराव यांनी संघटनेची भूमिका, कार्यपद्धती आणि भविष्यातील दृष्टीकोन स्पष्ट केला. महाराष्ट्रातील प्रत्येक भागात SMCC चे स्वतंत्र अध्याय (Chapters) स्थापन करून मराठी उद्योजकतेला संघटित, सक्षम आणि राष्ट्रीय स्तरावर नेण्याचा ठाम निर्धार त्यांनी व्यक्त केला.
बैठकीत मराठी उद्योजकांचे नेटवर्किंग, व्यवसाय सहकार्य, SMCC ची उद्दिष्टे व आगामी उपक्रम, सदस्यांमधील संवाद आणि नेतृत्वविकास यासारख्या मुद्द्यांवर सखोल चर्चा करण्यात आली.
यावेळी चारकोप विभागाचे संयोजक श्री. सचिन धामणे यांनी अधिकाधिक मराठी उद्योजकांनी या व्यासपीठाशी जोडावे, असे आवाहन करत SMCC च्या माध्यमातून सामूहिक प्रगती साधण्यावर भर दिला.
कार्यक्रमाच्या यशस्वी आयोजनाबद्दल सर्व सदस्य, अतिथी आणि आयोजकांचे मनःपूर्वक आभार मानण्यात आले. SMCC च्या या उपक्रमामुळे मराठी उद्योजकतेला नवी दिशा आणि नवे बळ मिळाल्याची भावना उपस्थितांमध्ये व्यक्त झाली.
